Repartición de puntos entre Viaxes Amarelle e Poio FS nun intenso partido (2-2)
Por Redacción
Dous goles de Ceci valeron ao Poio Fútbol Sala para salvar un punto da súa visita á cancha do Viaxes Amarelle coruñés (2-2).
En dúas ocasións adiantouse o conxunto local, que marcou xa aos catro minutos por medio de Musta nun partido caracterizado pola intensidade e a igualdade entre ambos os dous equipos.
As vermellas non lograron empatar ata a segunda metade, no minuto 26, no que foi o inicio de tres minutos tolos co 2-1 de Cruz para as da Coruña e o segundo e definitivo tanto da xogadora internacional do Poio que devolvía as táboas ao marcador.
Ata o final o encontro puido decantarse cara a calquera dos bandos, pero o electrónico xa non se moveu.
Con este resultado o Poio Fútbol Sala mantén a distancia coa zona de descenso na undécima posición da Primeira División Feminina, con 21 puntos.
VIAXES AMARELLE (2): Leti, Lago, Musta, Dolo, Cruz -quinteto inicial- Monchi, Luci, Patri.
POIO FS (2): Silvia, Charo, Ceci, Claudia, Peke -quinteto inicial- Elena, Yoly, Kiko.
Árbitros: Darriba Villamora e Castro Bermúdez. Amoestaron á xogadora local Cruz.
Goles: 1-0 Musta, min.4; 1-1 Ceci, min.26; 2-1 Cruz, min.27; 2-2 Ceci, min.28.
Incidencias: Partido disputado no Polideportivo Municipal Sagrada Familia da Coruña.