Duro correctivo do Silva a un Arosa irrecoñecible (3-0)
Por Redacción
Segue a costa abaixo dun Arosa que encaixou na Grela a súa terceira derrota consecutiva, esta vez a mans do Silva, sufrindo un severo correctivo nun partido en que a falta de tensión arlequinada tivo o seu reflexo na forma de encaixar os goles.
Dúas accións a balón parado e unha contra, todas elas no segundo tempo, deron unha xusta vitoria ao cadro coruñés, máis intenso nas súas accións e que apenas foi esixido polos de Piscis.
Os arosistas apenas crearon perigo. Custoulles entrar no partido, aínda que dispuxeron dunha primeira oportunidade, das escasas que xeraron no partido, nas botas de Fran Fandiño (minuto 25) ao recibir un pase de Hugo Soto, pero o seu remate marcharíase alto.
Con problemas na saída de balón, a primeira parte terminou cun par de ocasións para os locais, sen consecuencias.
Pero ao pouco de comezar a segunda metade, Michi Leal, á saída dun corner (minuto 50), adiantaba ao Silva.
A superioridade local nesta segunda parte foi absoluta, conseguindo ampliar diferenzas de novo nunha acción a balón parado (minuto 66), nun remate de Marcos.
O Arosa reaccionou timidamente e puido meterse no partido (minuto 80) pero Dani Bea non conseguiu superar ao meta Guillermo, que rexeitou o balón.
E cando o partido camiñaba cara ao seu final (minuto 86), Callón, culminando unha contra, pechaba a goleada para un Silva que non chegaba no seu mellor momento, tras encaixar un severo 5-0 o domingo anterior en Boiro, pero que desta forma sitúase na zona tranquila, afastando ao Arosa da zona nobre.
Relacionadas:
-
O Arosa segue costa abaixo e non pasa do empate fronte ao Galicia Mugardos (1-1)
Por Redacción |
-
O Arosa reforza a portería coa fichaxe de Javi Sánchez
Por Redacción |
-
O Negreira sorprende un Arosa en horas baixas (2-2)
Por Redacción |
-
Arosa e Concello de Vilagarcía cítanse para o martes 13
Por Redacción |
-
Guerra entre o Arosa e o Concello pola cantina do Manuel Jiménez e a publicidade da Lomba
Por Redacción |
-
O Choco pasa por encima dun Arosa decepcionante (1-3)
Por Redacción |