O Club de Tenis e o Mercantil Pontevedra ascenden á máxima categoría galega de tenis
Por Redacción
Dobre éxito do tenis pontevedrés. O equipo feminino do Mercantil Pontevedra logrou o ascenso á máxima categoría galega por equipos, a tan desexada División de Honra Ouro. Tamén o logrou o Club de Tenis Pontevedra, que competirá o ano que vén na mesma liga.
Segundo informa a entidade nun comunicado, o ascenso do Mercantil conseguiuse nun partido contra o Zona Indoor da Coruña.
As xogadoras pontevedresas venceron con contundencia por catro partidos a cero.
O equipo feminino do Mercantil Pontevedra está composto polas xogadoras Kyria Barros, Irene Riveiro, Laura Alvarez e Marta Rozados.
Pola súa banda, o combinado feminino do Club de Tenis Pontevedra superou por 3-1 ao Club de Tenis Coruña na final correspondente á división Prata do Campionato de Galicia, conseguindo desa forma o título de campión galego.
Carla del Barrio, Lucía Peraza, Nadia Cernadas e Noemí Iglesias son as catro mozas artífices deste logro.