Partidazo do Peixe Galego para vencer ao Leyma Coruña e volver engancharse á LEB Ouro (73-67)
Por Redacción
Tirando de orgullo e levado en bolandas pola afección da Raña, o Peixe Galego conseguiu ao fin deixar atrás a súa mala serie, que lle fixo encadear oito derrotas consecutivas en liga, cun triunfo de gran valor.
Os de Marín venceron ao potente Leyma Coruña (73-67) no derbi disputado este domingo e engánchase de novo á LEB Ouro abandonando os postos de descenso.
O Peixe, que aínda non podía contar coa achega de Andrés Miso e cunha rotación máis curta que a do seu rival na que só participaron oito xogadores, saíu concentrado desde o inicio para tentar evitar que se lles escapasen os coruñeses no marcador.
Sen Miso e con Derksen sen entrar tanto en xogo como noutros encontros, o peso ofensivo do equipo recaía esta vez no xogo interior, cun acertado Jason Cain (17 puntos), motivado ante o seu ex-equipo.
Así os de Javi Llorente demostraron xa no primeiro cuarto que ían en serio (22-15) e, cun gran nivel defensivo, confirmáronse no segundo parcial para chegar ao intermedio en vantaxe (38-30).
Reaccionou o Leyma Coruña e apertou o electrónico, pero esta vez os marinenses non tiñan pensado renderse. Mantivéronse á fronte pese ao acelerón laranxa no terceiro cuarto (59-55) e non se descompuxeron polo cansazo cando a falta de menos de tres minutos o Leyma estaba a unha canastra de distancia (65-64).
Foi no último cuarto cando emerxeu a figura de Tim Derksen, que con 8 puntos nos últimos minutos (19 en total), axudando aos locais para pechar un triunfo vital, que rompe unha dinámica e dá ás ao equipo para afrontar con ilusión a segunda volta da liga.
Relacionadas:
-
Triunfo vital do Peixe Galego sobre o Huesca (73-71) cunha tripla de Andrés Miso sobre a bucina
Por Redacción |
-
Moito máis que un partido para o Peixe Galego
Por Redacción |
-
Movementos no Peixe Galego, que dá a baixa a Cabanas e reforza a súa liña exterior
Por Redacción |
-
As baixas castigan ao Peixe Galego en Melilla (91-63)
Por Redacción |
-
Marín saca peito dun ano histórico para o seu deporte
Por Redacción |
-
O Peixe Galego despide o ano cunha derrota en San Sebastián (83-64)
Por Redacción |