Pablo Díaz, director técnico da Gimnástica: "Temos claro que somos un equipo modesto, moi competitivo pero modesto"
Por Redacción
Despois do segundo posto do seu grupo na primeira xornada da División de Honra Masculina detrás do Marathon Madrid, a Sociedad Gimnástica aspira o próximo día 18 a certificar a súa permanencia na máxima categoría do atletismo nacional na cita que se celebra en Burgos. Ata o momento para Pablo Díaz, director técnico do club, o rendemento está a ser moi positivo.
Pasada a primeira xornada de competición que destacarías e que cres que hai que mellorar?
Destacaría o carácter gañador do equipo, que aínda que se ía con moitas baixas, todos competiron ao máximo das súas posibilidades. Ao final, os mellores estiveron nos postos cabeceiros e o resto soubo estar diante dos que nos xogabamos os puntos. E mellorable, recuperar a xente que non estivo por lesión, espero que nas seguintes citas poidan estar todos e ter problemas á hora facer a convocatoria por ter 'overbooking'.
Ata once atletas debutaron en División de Honra en Aranjuez, é unha revolución?
Podemos dicir que é unha renovación pero non revolución. Contabamos con cinco ou seis posibles debutantes de xente que fichamos, pero as baixas por lesión fixeron que algunha xente subise o equipo por necesidade. Ademais dos once cinco foron galegos e da casa, saíndo de categorías inferiores. Co que quedo é que a pesar das incorporacións, o bloque e columna vertebral do equipo segue sendo practicamente o mesmo. Gustaríame facer unha chamada de axuda a todos os que nos apoian, para que o sigan facendo como ata agora, xa que o relevo xeracional non é doado, para sacar atletas novos necesitamos adestradores e apoios a estes, infraestruturas, instalacións, convenios, colexios, escolas e remuneración para todo isto. Estase a facer ben, queremos que siga así e temos medo que pola situación económica pasen oportunidades que despois poderiamos chegar a botar de menos.
Como ves a próxima xornada en Burgos contra o equipo local, o Universidade de Burgos, Unicaja Jaén e Barcelona?
A priori preséntase moi axustado. Queremos estar na loita polo segundo posto que nos aseguraría entrar nos oito mellores equipos, estar na xornada final polo título e o máis importante ter a permanencia asegurada. Se quedamos terceiros teremos que esperar resultados doutros encontros. O Burgos parece o equipo máis frouxo, pero o feito de competir na casa fai que poidan ser perigosos. O rival máis directo creemos que é o Unicaja, teñen un equipo forte e compensado, e o Barcelona ao seu. Esperamos recuperar polo menos a tres ou catro atletas lesionados, en concursos e fondo, aínda que perdemos os nosos dous marchadores xa que se clasificaron para a Copa de Europa de marcha, Marc Tur como Júnior, e Alex Studer con Suíza. Esperamos poder librarnos, pero se tivésemos que ir á final para evitar o descenso temos equipo abondo para ser dos mellores nesa xornada. Temos claro que somos un equipo modesto, moi competitivo pero modesto.
Relacionadas:
-
Segunda xornada de División de Honra para unha Gimnástica que busca meterse na final polo título
Por Redacción |
-
Barcelona, Unicaja Jaén e Caja de Burgos, rivais da Gimnástica na segunda xornada de División de Honra
Por Redacción |
-
Gran papel da Gimnástica na primeira xornada da División de Honra disputada en Aranjuez
Por Redacción |