O Barro CF despídese de Benigno, o seu maior seguidor
Por Redacción
"A perda que sufrimos hoxe é algo moi doloroso que vai ser difícil de superar".
Con esas verbas comeza a sentida carta de despedida que José Sanmartín, preidente do Barro CF, dedicoulle ao maior seguidor do club e a un home moi coñecido no fútbol afeccionado e veterano da comarca.
"Herlindo, pero para todo mundo Benigno, para todo este club non solo eras socio e afecionado, eras O AFECCIONADO, o que máis veces viñeches ver o Barro tanto na casa coma de visitantes", sinala Sanmartín.
A historia do Barro, asegura, está moi ligada á súa presenza, e sempre sacaba tempo para seguir aos equipos veteranos do municipio como o propio Barro, Terras de Curro ou Carballo da Portela.
"Era tan coñecido que case ningún club lle cobraba a entrada", rememora o presidente.
Por ese motivo, ademais de trasladar as súas condolencias á familia, Sanmartín conclúe a súa emotiva despedida asegurando que "o teu transistor non se apagará, será un recordo para sempre. Ti vaste, pero o teu espíritu quedará con nós".