Xian Silva, subcampión de Europa júnior de taekwondo en Vila Nova de Gaia (Portugal)
Por Alejandro Espiño
Novo éxito para o pontevedrés Xian Silva. O taekwondista do club Mace Sport proclamouse este sábado subcampión de Europa júnior na categoría de -73 quilogramos. Foi no campionato que se está celebrando esta fin de semana na cidade de Vila Nova de Gaia (Portugal).
Na rolda preliminar comezou enfrontándose ao croata Luka Horvat, ao que superou por un resultado de 5-3. O seguinte combate foi o máis apertado. Venceu tan só por un punto (3-4) ao ruso Sergei Smirov. A partir de aí as cousas foron máis fáciles para o pontevedrés.
Nos cuartos de final foi moi superior ao alemán Edward Luft ao que eliminou por un amplo marcador de 9-2, e nas semifinais enfrontouse ao polaco Karol Holubowicz, ao que tamén gañou con certa facilidade (9-3).
Na final esperábao o italiano Roberto Botta, que superara nas semifinais ao ucraíno Oleksandr Slynko por un apertado 8-9. Pero no último combate, Botta foi superior e logrou o ouro ao derrotar ao deportista de Poio por 16-6.
En todo caso, esta medalla de prata é toda unha fazaña para Xian Silva, especialmente polo gran nivel e a enorme participación que había neste campionato de Europa. Un xusto premio para un sensacional campionato.