O Concello tende a man a un acordo para manter aberto Rías do Sur: "Pola nosa parte non vai quedar"
Por Diego Espiño
A decisión da Fundación Rías do Sur de pechar o complexo deportivo de Ponte Muíños ao non poder asumir os custos para o seu mantemento, colleu de sorpresa o Concello de Pontevedra, que se atopaba negociando un convenio para colaborar neste aspecto.
Así o asegurou este mércores o edil de Deportes, Tino Fernández, tendendo a man municipal para manter activa a que está considerada como "unha instalación estratéxica".
"Mantivemos reunións cos representantes da Fundación nas que expresamos a nosa vontade de chegar a acordos e de colaborar na medida das nosas posibilidades. Pola nosa banda non vai quedar. Imos tentar buscar alternativas e solucións para que a piscina non peche ou peche o menor tempo posible", defende Fernández.
En todo caso o concelleiro responsable da área deportiva lembra que "nós non formamos parte da Fundación, é unha entidade privada, que conta con noso apoio pero que ten que ter en conta as dificultades administrativas coas que se atopa calquera concelleiro ou calquera alcalde á hora de tomar unha decisión. Evidentemente os tempos administrativos son os que son, son complicados, estamos a final de ano co cal as partidas orzamentarias están bastante esgotadas e hai que buscar fórmulas, e niso estamos a tentar buscar fórmulas".
Tino Fernández explica ademais que "primeiro temos que saber cal é o custo, estaba pendente de remitírsenos unha serie de documentación cos gastos de climatización, de auga, etc, e a partir de aí valorar que parte temos que asumir nós, que parte ten que sumir a Fundación e que parte teñen que asumir se cadra os clubs que vaian adestrar alí".
O que non fará o Concello de Pontevedra é asumir o custo total da instalación porque facelo "sería tanto como dicir que municipalizamos o servizo sen municipalizarlo. Ademais dos problemas administrativos e mesmo legais que nos pode supoñer non parece procedente", defende o concelleiro de Deportes.
O convenio que se atopaba negociando o goberno local con Rías do Sur ten como obxectivo garantir o acceso á lámina de auga aos clubs e deportistas federados da cidade así como permitir a organización de competicións e eventos oficiais.
Relacionadas:
-
O PP reclama que se poña en marcha o "convenio incumprido" para reactivar o Complexo Deportivo Rías do Sur
Por Redacción |
-
A piscina de 25 metros de Rías do Sur seguirá aberta á espera dunha solución que permita reabrir a olímpica
Por Manu Otero |
-
O luns 12, data clave para o futuro de Rías do Sur cunha reunión a tres bandas entre Concello, Fundación e clubs
Por Diego Espiño |
-
Reunión entre o PP e os clubs afectados polo peche de Rías do Sur para "buscar solucións conxuntas"
Por Redacción |
-
Vida extra ata final de ano para evitar o peche de Rías do Sur
Por Diego Espiño |
-
Rías do Sur volve pechar ao non poder facerse cargo a Fundación "do groso dos gastos que conleva"
Por Diego Espiño |
-
O enchido da piscina olímpica, á espera de que "ENCE nos diga cando nos pode dar enerxía calorífica"
Por Diego Espiño |
-
Rías do Sur, en xaque pola seca... e pola situación de ENCE
Por Diego Espiño |
-
Tensa espera para os traballadores de Rías do Sur tras o acordo para poñer fin á concesión de Supera
Por Diego Espiño |
-
Supera renuncia á concesión de Rías do Sur tras asinar un acordo extraxudicial coa Fundación
Por Diego Espiño |
-
Ao choio para poñer a punto a piscina olímpica de Ponte Muíños
Por Redacción |
-
A seca frea a reapertura de Rías do Sur: "Non encheremos a piscina ata que a situación cambie"
Por Diego Espiño |