Galegos, asturianos, cántabros e leoneses (sen Segoviana nin Numancia), rivais do Pontevedra en Segunda Federación
Por Manu Otero
A Real Federación Española de Fútbol aprobou este martes na súa asemblea xeral a configuración dos cinco grupos que compoñen a Segunda Federación.
Tendo en conta o voto dos representantes das federacións territoriais, o ente nacional sacou adiante a proposta que máis gustaba aos seis clubs galegos, a que os encadraba cos rivais máis próximos a nivel xeográfico.
Así, o grupo primeiro queda composto polos seis equipos galegos (Deportivo Fabril, Compostela, Pontevedra, Coruxo, Ourense CF e Racing Vilalbés), cinco asturianos (CD Covadonga, Mariño de Luanco, Real Avilés, UP Langreo e Real Oviedo Vetusta), tres cántabros (CD Cayón, Ximnástica de Torrelavega e Raio Cantabria) e catro castelán leoneses (Zamora, Guijuelo, Valladolid Promesas e Arandina).
A única modificación con respecto á proposta que defendían os equipos galegos está na repartición da cota leonesa. Finalmente a RFEF decidiu encadrar á Ximnástica Segoviana e ao Numancia no grupo dos madrileños, manchegos, estremeños e canarios. A cambio, a Arandina, que será o desprazamento máis longo que terá que realizar o Pontevedra na próxima tempada, quedou incluído no grupo I.