Lores avanza a promotores culturais que impulsarán a Pontevedra como "centro do deseño e a creatividade"
O sector das industrias culturais é, xunto co turismo de "alta calidade", o que máis futuro ten na cidade, segundo o candidato do BNG, Miguel Anxo Fernández Lores. Por iso, os nacionalistas xuntaron este xoves no Casino Mercantil a unha representación dos promotores da cidade para avanzarlles que "van a ser apoiados polo Concello" para promocionar a cidade de Pontevedra como un referente cultural en Galicia.
En concreto, Fernández Lores asegurou que o BNG quere impulsar a Pontevedra como un "centro do deseño e a creatividade", que terá como eixe o viveiro de empresas que impulsan a Universidade, o INCYDE e a Zona Franca de Vigo -agora freado por problemas de financiamento, recoñeceu, pero que agardan desbloquear en próximos meses-. Acollerá emprendedores relacionados con Belas Artes, Deseño e Moda, Publicidade ou Comunicación Audiovisual.
Todo o "gran potencial" de Pontevedra no ámbito da cultura, das artes escénicas, das festas, da produción audiovisual ou das editoriais ten, destacou Lores, un "longo percorrido" e recordou que todas estas empresas e colectivos "xeran moita actividade económica e crea postos de traballo", polo que asegurou "temos que coidar deles".
Ademais, o candidato do BNG adiantou que, en canto aos grandes eventos culturais que acolle Pontevedra ao longo de todo ano -citou expresamente os casos do Salón do Libro, o Festival de Jazz ou o Culturgal-, traballarase para ampliar a súa proxección internacional.
Fernández Lores tamén sinalou que a aula de teatro municipal, as bandas de música de Pontevedra ou Salcedo, o conservatorio, o Seminario de Jazz ou o Local de Música son só algúns dos exemplos do "gran traballo" que se fai na cidade neste ámbito cultural.
Relacionadas:
-
A Deputación ofrécelle aos concellos participar no seu posto no Culturgal
Por Redacción |
-
Lores, aos seus votantes: "Que non se confíen. Fan falta todos os votos para que non deamos unha volta atrás"
Por Alejandro Espiño & Mónica Patxot |
-
Galiza Nova reparte preservativos para "convidar a mocidade a protexerse co voto"
Por Redacción |
-
Lores presenta as noventa medidas que porá en marcha durante os primeiros 100 días de goberno
Por Alejandro Espiño |
-
O BNG creará unha rede de voluntariado para dar un "salto adiante" na acción solidaria dos pontevedreses
Por Alejandro Espiño |
-
Lores conta cos taxistas para establecer un transporte público a demanda no rural
Por Alejandro Espiño & Cristina Saiz |