Nunha noite xa calorosa, o cantautor ferrolán Andrés Suárez logrou aumentar a sensación térmica na praza da Ferrería onde centos de seguidores apiñábanse para seguir os temas do músico de Pantín.
E no seu concerto en Pontevedra estivo acompañado pola gaiteira ourensá Cristina Pato, que adornou varios temas de Andrés Suárez tanto ao piano como coa gaita. Entre eles, a versión de 'Negra sombra', que entusiasmou ao público que se daba cita neste novo concerto das Festas da Peregrina.
O cantautor presentou os temas do seu último disco, 'Desde una ventana' e ofreceu a súa interpretación de éxitos como 'Que levante la mano' ou 'Vuelve'.
Este mércores continúan os concertos dentro da programación da Semana Grande das Festas. Ás 21.00 horas, o escenario da praza da Ferrería contará coa actuación de Odaiko e Vanesa Muela, recuperadores da música tradicional e a partir das 22.30 horas chegará un dos concertos máis esperados dentro da programación, o de Bunbury na Praza de España. O ex líder de Héroes del Silencio ofrecerá os grandes éxitos do seu repertorio e temas do seu último traballo, 'Expectativas'.