Un dos eventos que revolucionou o panorama galego este ano, a Bienal de Arte de Pontevedra -recuperada tras quince anos de ausencia-, recibirá un dos Premios da Cultura Galega 2025.
Será na categoría de artes visuais, segundo anunciou este xoves o xurado destes premios, presidido polo conselleiro de Cultura, Lingua e Xuventude, José López Campos.
Con todo, a Bienal, organizada pola Deputación de Pontevedra e o Museo de Pontevedra entre os meses de xuño e setembro, non é o único recoñecemento na área pontevedresa.
O Premio da Cultura Galega 2025 en música será para Bodegas Martín Códax, en Cambados, pola súa implicación en proxectos como os Premios Martín Códax da Música, que organiza cada ano a asociación de Músicas ao Vivo.
Ademais, esta compañía é impulsora de varios ciclos musicais propios, entre eles Os Xoves de Códax, que xunta nas súas instalacións de Cambados proxectos musicais escénicos galegos e foráneos, ou o festival Outono Códax, en Santiago.
O resto dos premiados son Editorial Galaxia (letras), a Mostra de Teatro Cómico e Festivo de Cangas (artes escénicas), Baños Films (audiovisual), a campaña 'Aquí tamén se fala' (lingua), Antón Corral (patrimonio cultural) e o programa radiofónico Sempre en Galicia (proxección exterior).
Con estes galardóns, a Xunta de Galicia busca distinguir a excelencia creativa, a capacidade de intercambio, a experimentación e a proxección do panorama cultural da comunidade.
Ademais, teñen como obxectivo recoñecer o compromiso de proxectos, traxectorias e iniciativas que enriquecen a realidade e identidade cultural de Galicia.
Xunto con López Campos, o xurado estes premios contou con numerosas personalidades do eido da cultura e da comunicación.
Entre eles estiveron o reitor da Universidade de Santiago, Antonio López; o presidente da Real Academia de Belas Artes, Manuel Quintana Martelo; a vicepresidenta do Consello da Cultura Galega, Dolores Vilavedra; ou María López Sández, en representación da Real Academia Galega.
Alberto Sueiro, director do Festival Internacional Outono de Teatro; Verónica Santos, directora de Acción Cultural na Fundación Cidade da Cultura; Andrea González, pianista e directora do festival IKFEM; ou a xornalista Esther Estévez, tamén integraban este comité.