O público desborda o Principal na representación máis fiel ao soño escénico de Castelao

O Teatro Principal quedou pequeno este sábado ante o abarrote de público que acudiu para gozar dunha representación verdadeiramente única de "Os vellos non deben de namorarse", a soada obra de Alfonso Daniel Rodríguez Castelao.

A expectación era tal que, antes de abrirse as portas, a cola serpenteaba pola rúa Alhóndiga até chegar á casa consistorial.

A función, impulsada por Os de Algures, foi un exemplo de traballo colectivo e paixón pola cultura galega.

Na produción participaron máis de 60 persoas, coa implicación da Aula Municipal de Teatro, Tramoias de Algures, Tarabelo Teatro, Cafuné, Soalleira e Leña ás Ferreñas.

Pero o que fixo desta representación algo verdadeiramente especial foi a súa fidelidade ao soño escénico de Castelao.

A posta en escena recuperou non só o texto orixinal, senón tamén os deseños, cores, movementos e cancións que o propio autor imaxinara para a súa obra.

Cada detalle -desde o vestiario até as coplas que se entoaron sobre o escenario- reflectiu o universo creativo do artista de Rianxo.

Oito décadas despois da súa estrea en Buenos Aires en 1941, esta versión logrou algo excepcional como foi achegar ao público quizais a achega máis real ao que Castelao pensou.