A Sociedade Coral Polifónica de Pontevedra foi este xoves a protagonista da 48ª edición do prestixioso Premio Otero Pedrayo, nun emotivo acto celebrado no Pazo Provincial da Deputación de Pontevedra.
O galardón, que recoñece a súa traxectoria centenaria e o seu inestimable labor cultural, foi entregado en presenza de destacadas autoridades, entre elas José López Campos, conselleiro de Cultura da Xunta de Galicia, e Luis López, presidente da Deputación de Pontevedra.
A xornalista Belén López foi a encargada de conducir a cerimonia dun premio que, desde 1977, conceden conxuntamente a Fundación Otero Pedrayo, as catro deputacións galegas e a Xunta de Galicia.
Eduardo López Pereira, presidente da Fundación Otero Pedrayo, deu lectura á acta que confirmaba o merecido recoñecemento á Coral Polifónica, proposta pola Deputación de Pontevedra.
Durante a súa intervención, Luis López, presidente da Deputación, agradeceu a presenza do conselleiro de Cultura e destacou o compromiso das institucións coa cultura galega.
Lembrou o récord de visitas ao Museo de Pontevedra, que está próximo a celebrar o seu centenario, e incidiu en que o vindeiro ano acollerá o emblemático cadro de Castelao "A derradeira leición do mestre".
López subliñou que os premios como o Otero Pedrayo non terían existido sen o compromiso das catro deputacións e da Xunta, nin terían tanto prestixio sen a rigorosidade do xurado e o valor das numerosas candidaturas.
Felicitou a Coral Polifónica de Pontevedra, que cumpre cen anos sendo un "emblema desta sociedade" e un "potente motor cultural", intimamente relacionada co Museo.
Citou a Castelao e Filgueira Valverde como grandes impulsores, no seu momento, da Polifónica e agradeceu o traballo que durante todo un século realizaron os integrantes da agrupación musical.
A Sociedade Coral Polifónica de Pontevedra, fundada en 1925, celebrou este 2025 o seu primeiro centenario con diversos eventos que culminan con este premio galego.
Durante a cerimonia proxectouse un vídeo sobre a súa evolución e Ángeles Tilve, directora do Museo de Pontevedra destacou a íntima relación da institución coa Coral desde as súas orixes.
A Coral revolucionou o panorama musical galego ao ser a primeira en incorporar mulleres, rompendo convencións e converténdose nunha referencia imprescindible en toda España.
Ofreceu máis de 700 concertos, con actuacións internacionais en Lisboa (1934) e Bos Aires (1979), e hai dous anos sorprendeu coa interpretación das cantigas de Martín Códax.
"A súa historia é un exemplo de constancia e excelencia artística", sinalou Tilve, insistindo en que se mantivo fiel a un proxecto de innovación e tradición, renunciando ao protagonismo individual pola actividade colectiva e afirmando a Galicia como un valor central.
O premio, unha escultura denominada ‘Néboa’, foi entregado por Luis López a Carlos Valle, presidente da Sociedade Coral Polifónica.
Carlos Valle, na súa intervención, fixo referencia a Otero Pedrayo e á nómina de destacadas institucións e figuras que recibiron o galardón, subliñando que é un premio que se concede polos méritos recoñecidos.
Recordou que a Coral Polifónica foi a primeira entidade fundada na "década prodixiosa da cultura pontevedresa e galega" de 1925, dous anos antes da creación do Museo de Pontevedra.
Mencionou tamén a figuras como, entre outros, Losada Diéguez, Castelao (autor dos panos dos concertos e expresidente) e Xosé Filgueira Valverde, así como directores da agrupación.
Destacou que a Coral, non profesional, combina á perfección no seu repertorio música popular e culta, desde a Idade Media ata hoxe, incorporando obras dos seus directores que forman parte do patrimonio musical de Galicia, como "Se vas a San Benitiño", preparada polo que foi director Antonio Blanco Porto.
Agradeceu tamén o esforzo de todas as persoas que ao longo de cen anos fixeron posible a súa continuidade e o apoio da cidadanía e as institucións de Pontevedra.
Para finalizar, José López Campos, conselleiro de Cultura, sinalou que hoxe era un día especial non só para a Coral Polifónica, senón tamén para a provincia e para Galicia.
Agradeceu o labor das deputacións e destacou que 2025 é un ano que celebra a década de revolución cultural de hai un século coas Irmandades da Fala e a Xeración Nós.
Anunciou tamén que o 2026 será un ano extraordinario, con retos importantes dedicados á figura de Ramón Otero Pedrayo coa conmemoración dos cincuenta anos do seu pasamento.
O conselleiro resaltou a importancia das corais espalladas polo territorio, recuperando músicas ancestrais e realizando un labor social como punto de encontro, e felicitou á Coral Polifónica polo "moi merecido" premio e o seu compromiso social con Pontevedra.
O acto concluíu coa emocionante interpretación de tres pezas por parte dos máis de trinta integrantes da Coral Polifónica de Pontevedra, incluíndo o célebre himno popular pontevedrés "Se vas a San Benitiño", baixo as indicacións da actual directora Nanette Sánchez Ordaz.