O ciclo de curtos Cine do Mar será unha das grandes novidades da Festa do Mar de Combarro.
En colaboración coa Asociación Museo do Mar de Marín, as curtametraxes proxectaranse entre o xoves 28 e o domingo 31 de agosto na carpa-museo da Praza da Chousa.
De 12.30 a 13.30 horas proxectaranse curtas relacionadas coa temática do mar.
Abrirán o ciclo 'Danza o Batalla' de Danilo H. Galgano, 'Lagun' de Juan Larrañaga e 'El señor de las ostras' de Manuel Palenzuela.
O venres será a quenda das pezas 'Remar' de Adán Aguilar e 'Nika el calderón tropical' de José Hernández e Felipe Ravina, mentres que o sábado se proxectarán 'Testemuñas dunha illa' de Borja Duarte, Elian Mercedes e Guillermo Artero, e 'Voces do Mar' de Javier Lorenzo.
Por último o domingo exhibiranse as curtametraxes 'Chelito' de Carlos Prado, e 'Mexillonaria' de Pablo Chouza, pezas galardoadas respectivamente co premio do público (Polbo de Ouro) e o premio do xurado (Sardiña de Ouro) no Festival de Cine do Mar de Marín.
Ademais desta actividade, na carpa museo tamén se poderán visitar exposicións sobre a cultura mariñeira.
En colaboración con Culturmar ofrecerase a exposición fotográfica 'No centro do Mar', do autor Eduardo Rivo, en colaboración con Opmega e o Consello Regulador do Mexillón de Galicia colocaranse dúas maquetas de bateas, e xunto ao Museo do Mar de Galicia unha selección das súas pezas. Tamén se poderá visitar unha exposición de fotografía antiga seleccionada polo Ateneo Corredoira de Combarro.
Engade Pontevedra Viva como fonte preferida de Google de balde
Mantente informado coas últimas noticias de actualidade.