PortAmérica chegou ao seu fin. Tras tres días de concertos e de propostas gastronómicas de primeiro nivel, a Azucreira de Portas pecha as súas portas ao festival até o próximo ano.
Fíxoo tras unha edición pola que pasaron unhas 65.000 persoas.
A calor, que apertou tamén con forza na terceira e última xornada, non impediu que o público gozase cunha oferta musical que, a diferenza dos días anteriores, estaba especialmente orientada cara a un espectador máis adulto.
Non era para menos. Ao escenario do PortAmérica subiron dous históricos da música española como son Duncan Dhu e Melendi quen, especialmente este último, congregaron a miles de fans que abarrotaron o recinto do festival.
Foi despois de que a tarde comezase cos concertos de Diego Lara, Carla Lourdes e dous artistas xa plenamente consolidados na escena 'indie' española: Carlos Ares e Travis Birds, cuxas voces resoaron por toda a Azucreira cando máis abrasaba o sol.
Tras eles, Mikel Erentxun -sen Diego Vasallo- demostrou que os 'vellos rockeiros' nunca morren e protagonizaron un concerto co que celebraron o seu corenta anos de traxectoria e no que soaron En algún lugar ou Cien gaviotas, auténticos himnos da música española.
Para enerxía, a que despregou a continuación a banda Sidonie sobre o escenario, mostrando por que levan tanto tempo sendo unha das grandes referencias da escena nacional. Repasaron todos os seus grandes éxitos e atrevéronse mesmo, en pleno regreso de Oasis, coa súa particular versión de Wonderwall.
Pero, sen dúbida, quen desatou o delirio nesta xornada de sábado foi Melendi. O artista asturiano, que leva máis de vinte anos "camiñando pola vida" dos escenarios, atopou na súa madurez un equilibrio que se nota cada vez que actúa ante recintos como o de Portas.
Antes de botar o peche á súa décimo terceira edición, aínda quedaba a traca final. Foi a que protagonizaron Viva Suecia, unha banda que por dereito propio xa está no olimpo do 'indie' nacional, e a música electrónica de Galicia Army.
Polos fogóns do ShowRocking pasaron, pola súa banda, Nagore Irazuegui & Rodrigo Fonseca, Antonio Arrabal, Sergi Aritzeta, Alén Tarrío, Carito Lorenço, Dani Carnero, Begoña Rodrigo, Catalina Vélez, Fabián Delgado, Álex Marugán e Felipe Tomita.
Entre uns e outros protagonizaron unha edición para o recordo dun festival que, como cada ano, conseguiu superarse a si mesmo. Queda o listón ben alto, pero seguro que en 2026 elevarano aínda máis. Longa vida ao PortAmérica.