Os equipos de tres das series con máis candidaturas aos Premios Feroz 2026 pasarán por Pontevedra antes de que finalice este ano. Trátase de Superestar, Yakarta e Poquita fe.
As actrices Ingrid García-Jonsson, Rocío Ibáñez, Julia de Castro e Carla Quilez, xunto cos creadores Nacho Vigalondo, Diego San José e Pepón Montero manterán un coloquio co público tras proxectar varios dos capítulos das súas series.
Estas actividades, as últimas que os Feroz farán antes de final de ano, comezarán o xoves 18 de decembro.
Ese día serán as actrices nomeadas ao Feroz Ingrid García-Jonsson e Rocío Ibañez, xunto co creador Nacho Vigalondo, quen presenten Superestar.
Superestar é unha volta aos estrambóticos inicios dos anos 2000, reimaxinando dunha forma única a vida da icona pop Tamara e a súa metamorfose en Yurena.
Nesta serie, producida por Javier Ambrossi e Javier Calvo, tamén destacan as interpretacións de Natalia de Molina e de Secun de la Rosa como Loly Álvarez e Leonardo Dantés.
Ao día seguinte, o venres 19, será a quenda da serie Yakarta xunto ao seu creador, Diego San José, e a actriz Carla Quilez, que comparte protagonismo nesta ficción con Javier Cámara e David Lorente.
Este drama conta a historia de José Ramón, un ex xogador olímpico de bádminton que dá clases nun instituto dun barrio moi humilde.
Joserra cre descubrir nun torneo escolar o diamante en bruto que pode darlle un xiro á súa vida: Mar podería ser o billete que lle leve a cumprir o seu soño de competir en Yakarta, a cidade onde os ex xogadores como el son respectados e tratados como estrelas.
E para (case) finalizar o ano cunhas boas gargalladas, o 26 de decembro proxectaranse algúns dos episodios da segunda tempada de Poquita fe.
Julia de Castro, candidata como mellor actriz de reparto dunha serie, e Pepón Montero, un dos creadores desta exitosa comedia compartirán as claves que manexaron para lograr que o seu humor sexa costumista e absurdo á vez.
As entradas a todas as sesións son gratuítas previa retirada de localidades na oficina de turismo da Praza de España, desde sete días antes de cada actividade e até completar o aforamento. Haberá un máximo de dúas entradas por persoa.