Os equipos masculino e feminino do Club Waterpolo Galaico Pontevedra buscarán este sábado 3 de outubro o primeiro título oficial da tempada, a supercopa galega.
A piscina do Centro Galego de Tecnificación Deportiva acollerá os dous partidos, ambos ante o Club Natación Coruña.
A xornada, que contará con entrada de balde para o público, comezará ás 17:00 horas coa final feminina, mentres ás 19:15 horas será a quenda dos rapaces.
Entre medias, os conxuntos infantís de ambos clubs disputarán un encontro amigable (18:15 horas).
O Waterpolo Galaico inicia a tempada oficial mentres negocia horas de piscina en Rías do Sur, instalación que polo momento non poden utilizar: "pese a las adversidades estamos intentando llegar a un acuerdo por el bien de nuestros jugadores", explicou a súa presidenta Paqui García.
É a quinta vez que se organiza a supercopa galega, e en todas elas estivo representado o club pontevedrés.