Bo balance da Sociedad Gimnástica no Campionato de España Promesa de pista cuberta, que se celebrou en Antequera, localidade malagueña que albergará tamén a próxima fin de semana do Campionato de España Absoluto. Unha medalla de prata e tres postos de finalista foron os resultados alcanzados polos atletas do club pontevedrés.
Alberto Guerrero foi o único atleta pontevedrés en subir ao podio. Fíxoo na carreira de 800 metros, cunha marca de 1.53.00, obtendo a xa mencionada medalla de prata.
Manuel Molinos estivo a pelexar polas medallas no salto de altura. Superou os 2,07 á terceira tentativa, o que lle relegaba provisionalmente á cuarta posición, tiña que saltar a seguinte altura, 2,10, para subir ao caixón pero non puido ser.
Rocío Rodríguez encontrouse cunha final moi rápida na que as catro primeiras fixeron a mínima para o Campionato de España Absoluto. Rocío tivo que conformarse coa quinta posición, cun rexistro de 4.45.59.
Gonzalo Sánchez pechou a participación da Gimnástica no Campionato. A pesar de que correu en 6.98 a primeira rolda eliminatoria dos 60 metros, tanto na semifinal coma na final non mellorou este tempo e con 7.03 na final obtivo a sexta posición.
Na puntuación por finalistas, a Gimnástica consegue a undécima posición con 19 puntos, dun total de máis de 70 clubs que puntuaron.