Ao grande. Así conseguiu revalidar Carlos Álvarez o título de máximo goleador da Liga Asobal.
O extremo pontevedrés, no seu último partido co Ademar de León, asinou unha auténtica exhibición na xornada que pechaba o campionato para remontar na táboa de realizadores e levar por segundo ano o trofeo a casa.
A pesar da derrota do seu equipo na pista do BM Logroño (30-29), Carlos Álvarez anotou a espectacular cifra de 11 goles en 13 lanzamentos, cun 84,62% de acerto e un pleno (5/5) desde os 7 metros.
Grazas a eses números disparouse até os 178 goles en toda a tempada, cunha media de 5,93 tantos por encontro.
Desta forma superou a unha lenda como Antonio García, que co Granollers puña punto e final á súa exitosa carreira e que con 7 tantos no seu último partido quedou na clasificación final con 177 goles, só un menos que o pontevedrés.
Terceiro na táboa de realizadores foi Álvaro Martínez (Atlético Valladolid) con 174 goles.
Un novo recoñecemento ao talentoso xogador formado no Club Cisne, e que vén de ser escollido tamén por segunda tempada no 'All Star Team' de Asobal como mellor extremo dereito do campionato.
Unha despedida ao grande para o pontevedrés do seu equipo, o Ademar de León, antes de afrontar un novo paso na súa carreira o próximo curso nas filas do Sporting de Portugal.