A Carreira Carmiña suma adeptos á súa causa en Marín cun récord de participación na quinta edición desta atractiva proba deportiva. Case un milleiro de persoas citaranse este domingo para gozar dun percorrido nunha contorna privilexiada.
Coa saída programada para as 10:00 na Praia de Lapamán, os corredores afrontarán un percorrido de 10.6 quilómetros que une area, terra e asfalto a través do litoral da localidade rumbo cara á meta no Paseo Alcalde Blanco.
Do mesmo xeito que en edicións anteriores, haberá unha versión reducida de 5,4 quilómetros que arrincará media hora máis tarde no Náutico de Aguete.
Este xoves tivo lugar a presentación oficial da proba nas novas letras corpóreas de Marín coa presenza da alcaldesa da localidade, María Ramallo; os concelleiros Antonio Traba e Antonio Caíña; o organizador Víctor Riobó e o campión olímpico e embaixador da proba, Juan Carlos Higuero.
En relación ao éxito de participación, a alcaldesa afirmou que "dada a altísima demanda que houbo este ano, vímonos case obrigados a aumentar inscricións e nós encantados".
Engadiu, ademais, que "creemos nesta proba, nunha carreira diferente, nun momento no que o running está de moda e que pode ser a maridaxe perfecta entre deporte e disfrute no municipio".
Co obxectivo de fomentar os hábitos saudables entre todas as idades, a Carreira Carmiña tamén ten a súa variante para os escolares.
Deste xeito haberá modalidades desde Sub-10 até Sub-16 con saída e meta no Paseo Alcalde Blanco a partir das 11:35.