O Club Baloncesto Arxil e o AD Cortegada xa coñecen quen serán os seus rivais na Liga Feminina 2, tras a ampliación á que se viu sometida a segunda categoría nacional.
Segundo estableceu este martes a comisión xestora da Federación Española de Baloncesto (FEB), a LF2 estará composta por tres grupos de 14 equipos, quedando os galegos encadrados no Grupo A xunto a equipos de Asturias, País Vasco, Navarra, Estremadura e Canarias.
Na relación de equipos non figura finalmente o Peixe Galego, que solicitara praza para o seu proxecto feminino pero que era o segundo reserva establecido pola Federación no caso de haber prazas libres. Ao quedar só unha vacante, a deixada polo Aros León, os de Marín deberán esperar polo menos un ano para estrearse nesta categoría.
Desta forma no Grupo para competirán ademais de Arxil e Cortegada outros galegos como Universitario Ferrol, Celta e os recentemente ascendidos Masristas Coruña e Instituto Rosalía santiagués. O representante asturiano será o ADBA Avilés, os vascos Ibaizábal, Añares Rioja e Barakaldo, o Ardoi navarro, o estremeño Plasencia e os canarios Adareva e MagecTías.
"É un grupo de moito nivel, de moito desprazamento en autobús e desgaste físico e económico", valora o directivo arxilista Lino Vázquez, para quen "foi unha pena que ao final non entrase o Peixe Galego xa que nos evitaba ir a Plasencia".