Este mércores 22 de xullo cúmprese unha semana desde o inicio dos adestramentos do Pontevedra Club de Fútbol e, á súa vez, marca a conta atrás para o primeiro test de pretemporada do equipo de Rubén Domínguez.
Será o vindeiro mércores 29 de xullo ante o Deportivo Fabril, recentemente ascendido á categoría que compartirá grupo cos granates neste novo curso en Primeira Federación. O encontro disputarase no feudo do Villalonga FC, o Campo de Fútbol Novo San Pedro.
Esta será a primeira oportunidade para ver en funcionamento ás novas pezas dun conxunto granate ao que hai que sumarlle a recente incorporación do defensor David Alba, que chega procedente do Nástic de Tarragona.
Con esta fichaxe e a pouco máis dunha semana para o duelo ante o cadro herculino, a escuadra lerezana conta con 19 efectivos con ficha de primeiro equipo entre os que se atopan dez incorporacións e nove xogadores da tempada pasada.
Desta maneira, o club deixa tres licencias sénior e tres sub23 dispoñibles para reforzar o plantel no que resta de mercado estival e alcanzar esa cantidade de 22 xogadores á que fixo referencia o técnico ourensán tras a primeira sesión de adestramento da pretemporada.
De todos os xeitos, a experiencia dinos que o club lerezano tentará apurar as súas opcións ao máximo para optar ás coñecidas "oportunidades de mercado" que se presentan nas últimas semanas do período de traspasos.
Cabe lembrar que xogadores como Compa, Joao Resende ou Luisao Macías chegaron na última semana do mercado estival do pasado curso.
Doutra banda, a entidade granate aínda non optou por ningunha cesión como si fixo de cara á tempada pasada.
Este primeiro test de pretemporada tamén servirá para reencontrarse con algunha cara coñecida como a do propio Luisao ou a de Rubén López.
Quen non estará no filial deportivista será o ex granate Diego Gómez, cuxa cesión á SD Huesca oficializouse este martes.
O conxunto granate pechará a súa primeira semana de volta aos terreos de xogo coa disputa do Trofeo San Roque ante o Arosa SC. Será o sábado 1 de agosto na Lomba.
Engade Pontevedra Viva como fonte preferida de Google de balde
Mantente informado coas últimas noticias de actualidade.