Contratempo no Pontevedra Club de Fútbol, que está pendente dos seus servizos médicos para saber si pode contar co futbolista que esta tempada se mostrou máis diferencial até a data, Dalisson de Almeida, na 'final' polo liderado que lle enfrontará este domingo ao Numancia, o seu inmediato perseguidor na táboa.
O granate, que pasa por ser o máximo goleador do equipo (11 goles entre liga e Copa) e o xogador de campo con máis minutos en liga (só superado por Edu Sousa), finalizou o adestramento deste xoves con molestias musculares que poñen en risco a súa participación no decisivo partido.
Así o recoñeceu este venres Yago Iglesias na súa habitual comparecencia ante os medios de comunicación.
"Non parece nada grave", tranquilizou o técnico, aínda que "non sabemos o alcance da lesión. Esperemos que os servizos médicos nos dean a súa valoración canto antes", explicou.
"Ten toda a pinta de ser sobrecarga, pero hai que ver o risco que hai", afirmou Iglesias pensando no choque contra o Numancia.
Yago tamén se referiu á situación de Chiqui, coa grata noticia de que "esta semana xa fixo cousas co grupo", revelou.
No caso do extremo "tamén hai que decidir xunto aos servizos médicos se é pronto ou se está para formar parte da convocatoria", sinalou o preparador granate.
En canto ao resto do plantel estarán "todos dispoñibles" fóra dos lesionados de longa duración, posto que o técnico recupera para a cita a Samu Mayo e Pelayo Suárez tras cumprir un encontro de sanción.