Dúas de dúas para Mika Vijfvinkel na Vuelta a Madrid

Pleno de vitorias para o ciclista do Supermercados Froiz Mika Vijfvinkel, que se alzou co triunfo na segunda etapa da Vuelta a Madrid Sub-23 celebrada este martes con saída e chegada a meta en Alcalá de Henares.

O holandés, que xa se impuxo na xornada inaugural nun emocionante sprint final polas rúas de Móstoles, consolidou o seu mandato na xeral cun novo e pelexado triunfo que reforza as súas boas sensacións nesta primeira metade da competición.

O ciclista da escuadra alimenticia afrontou unha calorosa etapa de 134 quilómetros que arrincou ás 15:30 da tarde e que atravesou un dobre circuíto con subidas a Villalbilla e Loranca.

A pesar da vitoria de Mika, o protagonismo nos primeiros compases da carreira foi para outro ciclista do Supermercados Froiz, Loewis Bockstaele, que protagonizou unha fuga xunto a Joaquín Medina (Telco ON Clima Osés) e ao líder de montaña Cornee Vanslembrouck (Dovy Keukens).

Esta fuga foi neutralizada unha vez superada a hora de carreira e, a pesar dos intentos de reducidos grupos de ciclistas de tentar novas escapadas, o grupo principal de carreira chegou xunto ao tramo final en Alcalá de Henares.

¡¡Victoria para Mika Vijvinkel (@GFroiz)!! ¡El neerlandés repite triunfo!#VueltaMadridSub23 pic.twitter.com/e9fw725a2c

— Vuelta a Madrid Sub23 (@vueltamadridS23) July 8, 2026

Foi entón cando Mika Vijfvinkel fixo valer de novo o seu poderío no sprint para situarse á fronte nos 300 metros finais e cruzar a liña de meta en primeira posición. En segundo e terceiro posto entraron os españois Aimar Galdós (BBK Euskadi) e Luca Martínez (Selección Española júnior).

Esta vitoria sostén o liderado do holandés na clasificación xeral e manteno, unha xornada máis, co maillot vermello. Tamén mantén o maillot azul que lle recoñece como líder da clasificación da regularidade.

A terceira das cinco etapas que compoñen esta Vuelta a Madrid terá lugar este mesmo xoves no municipio de Parla cun percorrido de 126 quilómetros.