Calquera hora é boa para botarse a correr. Demostrárono este sábado o medio milleiro de atletas que participaron na segunda proba do Circuíto de Carreiras Populares de Pontevedra, a Urban Trail Night.
Era a estrea do trail nocturno e deixou boas sensacións. Os deportistas, cunha luz frontal na cabeza dado que parte do percorrido non contaba con iluminación, percorreron 14 quilómetros desde as inmediacións do Recinto Feiral ata a praza de touros da cidade, pasando pola senda do Lérez, Illa das Esculturas, casco antigo ou Alameda ata chegar ao seu destino.
Elías Domínguez foi o vencedor na categoría masculina ao completar o percorrido nun tempo de 50 minutos e 53 segundos. Só 10 segundos despois chegaba a meta Maikel Rodríguez, mentres Juan Sebastián Díaz (51:32) completou o podio na terceira posición.
Pola súa banda en categoría feminina a máis rápida foi Mari Ángeles Castro (1:04:49), con Saleta Aboy en segundo lugar (1:05:08) e María del Pilar López no terceiro (1:05:58).
Consulta aquí as clasificacións completas do I Urban Trail Night de Pontevedra.