Javi Gómez Noya non pelexará esta tempada por revalidar o seu título de campión das Series Mundiais de tríatlon pensando, unicamente, en chegar nas mellores condicións aos Xogos Olímpicos de Río no mes de agosto.
Por ese motivo o triatleta galego non participará esta fin de semana en Cidade do Cabo, terceira cita das Series Mundiais, e tampouco na seguinte cita, en Yokohama.
O seu debut nesta competición producirase "posiblemente en Leeds, en xuño", recoñeceu o seu adestrador, Carlos David Prieto, en declaracións á Televisión de Galicia. "Este ano non vai disputar o Mundial e só vai ser para preparar os Xogos", completou o preparador.
En plena fase de preparación, Gómez Noya ten previsto probar o seu estado de forma no campionato francés de clubs e estrearse esta tempada nunha gran competición a finais de maio no Campionato de Europa que se celebrará en Lisboa.
Este non era a idea inicial do pentacampión mundial, pero unha molestia física durante a pretemporada obrigou a variar a planificación do ano, co único obxectivo de lograr a medalla de ouro en Río de Janeiro.