O XVI Tríatlon Cidade de Pontevedra contou finalmente este sábado coa participación de preto de 400 deportistas e dous grandes vencedores, Inés Santiago e Antonio Serrat.
Ambos se proclamaron campións galegos absolutos nas carreiras que pechaban a xornada de competición, que tamén contou con carreiras para categorías populares e inferiores.
Na proba absoluta feminina a pontevedresa Carmen Gómez pelexou polo triunfo, pero quedou finalmente a 14 segundos da súa compañeira de equipo no Tríatlon Ferrol, Inés Santiago, vencedora cun tempo de 1:02:15. Terceira foi Camila Alonso, do mesmo club, que formou parte coas súas compañeiras do grupo dianteiro desde o sector de natación, do mesmo xeito que Melina Alonso.
Cuarta con todo foi a venezolana Joselyn Brea, que remontou no sector de carreira a pé tras quedar previamente descolgada.
En categoría masculina o vencedor foi o vigués Antonio Serrat, revalindando o título autonómico nunha carreira que dominou desde o sector ciclista, tras chegar pegado á cabeza na primeira transición. Acabou cun tempo de 54 minutos e 51 segundos, cunha ampla vantaxe sobre o segundo, Andrés Cendán (56:29) e o terceiro, Luismo Velásquez (56:37).
Completaron o palmarés do campionato Inés Castaño e Iván Puentes como gañadores en idade cadete, Inés Santiago e Andrés Cendán na junior, Aida García e Pedro Antonio Esmorís en Veterán 1, Andrés López en Veterán 2 e Susana Rodríguez en paratriatlón, e é que a deportista viguesa aproveitou a ocasión para realizar un test para os inminentes Xogos Paralímpicos.
Consulta aquí as clasificacións completas do XVI Tríatlon Cidade de Pontevedra.