Con só 24 anos, Jaime Duro pode presumir de ser campión do Mundo e de Europa de piragüismo maratón. Logrouno na proba curta mundialista en Gyor, Hungría, e na competición continental celebrada en Ponche de Lima, en Portugal.
Agora, tras estes éxitos, plantexa un xiro radical na súa carreira deportiva, e non só por cambiar de club deixando a súa casa, a EP Ciudad de Pontevedra, para pasar a competir coas cores do Fluvial de Lugo.
"É un obxectivo ambicioso, pero quero dar o salto á pista. É o momento de dar o salto ao sprint, de tentalo", recoñeceu nunha entrevista concedida á Real Federación Española de Piragüismo sinalando o seu desexo de centrarse na modalidade olímpica xa que "é agora ou senón xa no futuro creo que vai ser aínda máis difícil".
"O meu primeiro obxectivo é o selectivo nacional de Sprint Olímpico xa que quero estar centrado na pista nas probas do 500 e o 1.000, aínda que tamén me gustaría plantexar outros como o de tentar revalidar o título de campión do mundo de maratón de distancia curta en Arxentina", explica o canoísta pontevedrés.
"Son consciente de que é un obxectivo moi difícil de conseguir, pero si que é certo que en parte me motiva e o collo con ganas por iso, porque é algo realmente difícil e eu creo que saia ou non, vou estar satisfeito por tentalo. Eu creo que, se non o tento, ao final sempre me vou quedar con esa espiña", afirma ante a importante competencia que atopará no camiño.
Entre eles estará un amigo como Pablo Crespo, olímpico en París e que como el deixa atrás a EP Ciudad de Pontevedra para tratar de mellorar as condicións de adestramento, ante o problema de instalacións que sofre o equipo pontevedrés.
"Penseino moito xa que me daba pena deixar o club co que estiven toda a miña vida, pero tamén me apetecía cambiar de aires. Ademais, voume co meu amigo Pablo Crespo e vou poder seguir compartindo equipo con el, e iso foi algo que tamén valorei", recoñece Jaime Duro.
Queda un longo camiño, pero ganas non lle van a faltar. Os adestramentos para lograr triunfar no piragüismo olímpico xa comezaron.