O Arosa presentou na mañá deste luns a Jorge Otero como novo adestrador para a próxima tempada. O técnico de Nigrán faise cargo así do equipo arlequinado, tras decidir a directiva que preside Manolo Abalo non renovar a Piscis.
Cunha aínda curta experiencia como primeiro adestrador, Jorge Otero coñece á perfección a Terceira División, non en balde chega desde o Rápido de Bouzas, onde estivo as dúas últimas tempadas como máximo responsable, e antes como segundo de Juan Carlos Andrés, quen actualmente exerce de segundo técnico de Eusebio Sacristán na Real Sociedad.
Durante o acto de presentación, presidido polo máximo mandatario arlequinado, Manolo Abalo, o presidente quixo deixar claro que Jorge Otero era o primeiro candidato que barallara a súa directiva, a pesar dos nomes que circulaban pola cidade.
Pola súa banda, o novo técnico dixo chegar moi ilusionado a un club coa historia do Arosa, que lle converte nun dos mellores destinos para calquera adestrador en Terceira División, pero non quixo falar de obxectivos máis aló de conformar o equipo e logo ir día a día, sempre coa ilusión de que esa filosofía permítalle ir marcando eses obxectivos cada vez máis ambiciosos.