Case un mes despois da súa lesión, Juanra inicia a "conta atrás" para regresar aos terreos de xogo.
Así o asegurou o propio futbolista do Pontevedra nas súas redes sociais despois de ser intervido cirurxicamente dunha rotura do ligamento cruzado anterior do seu xeonllo esquerdo.
O central granate caeu lesionado no partido de liga contra o Mérida en Pasarón disputado o pasado 15 de novembro.
Segundo informa o club pontevedrés Juanra foi intervido este pasado mércores 10 de decembro no Hospital Asepeyo Coslada de Madrid.
"A intervención, realizada polo doutor Miguel Jiménez Fermín, discorreu segundo o previsto", confirma o Pontevedra.
O defensor, agora si, empeza a descontar follas do calendario cunha longa recuperación por diante, que non lle permitirá volver vestir de curto na presente tempada.
De feito en lesións similares o período de recuperación estímase entre os 6 e os 8 meses, polo que de cumprir os prazos podería recibir o alta no verán, antes do inicio do próximo curso.
"Non eliximos os golpes, pero si como volvemos", sinalou xusto despois da súa grave lesión o futbolista do Pontevedra, asegurando entón que "o meu compromiso é volver máis forte, traballar en silencio, disciplina e loitar como sempre".