O secretario xeral para o Deporte, José Ramón Lete Lasa, recibiu este martes á loitadora pontevedresa Lydia Pérez, recentemente proclamada subcampioa do mundo de loita praia, tras impoñerse nas dúas probas do Ranking Series nas que participou esta tempada, en Grecia e Exipto.
Durante o encontro, Lete Lasa salientou a "extraordinaria progresión" da deportista, que continúa a súa formación internacional primeiro en Francia e, actualmente, en Alemaña, dentro dun plan de adestramento financiado pola Xunta de Galicia.
Este programa permite que a loitadora poida competir con rivais do seu nivel co obxectivo de acadar a clasificación para os Xogos Olímpicos de Los Ángeles 2028.
O mandatario expresou a súa confianza en que Pérez logre finalmente o billete olímpico, despois de quedar ás portas nas fases clasificatorias de Toquío 2020 e París 2024.
"A nosa loita está a conseguir grandes resultados e Galicia merece un representante olímpico, algo que non acontece desde Seúl 1988, cando competiron Juan Antonio Caride e Alfredo Marcuño", subliñou.
Lete Lasa destacou tamén que o futuro Centro de Alto Rendemento Deportivo de Galicia, actualmente en desenvolvemento, servirá para acoller e potenciar a "excelencia deportiva" dunha comunidade que pasou de 300 deportistas de alto nivel en 2009 a preto de 1.700 na actualidade.
O centro, engadiu, abrirá as súas portas a talento internacional para consolidar Galicia como un polo de referencia no deporte mundial.
Neste contexto, o secretario xeral destacou a concentración deportiva organizada no Centro Galego de Tecnificación Deportiva, que conta coa presenza da loitadora francesa Emma Luttenauer, bicampioa de Europa sub-23 e tamén aspirante a participar en Los Ángeles 2028. O adestramento conxunto permitirá aos loitadores galegos compartir experiencia e aprendizaxe con deportistas da elite continental.