O Grupo Deportivo Supermercados Froiz terá representación no próximo Campionato de Europa de ciclismo na estrada, que se celebrará en Plumelec-Morbihan, localidade da bretaña francesa.
Alí estará o seu ciclista Martín Bouzas, seleccionado polo equipo nacional para participar na contrarreloxo sub-23 despois de destacar durante a tempada nesta especialidade.
Bouzas, actual campión de España da categoría contra o crono, competirá en Francia o vindeiro mércores 14 de setembro, sendo o outro representante da Selección Española Gonzalo Serrano (E.C. Cartucho).
O ciclista galego buscará realizar un bo papel nunha contrarreloxo na que deberá completar 25,5 quilómetros de percorrido.
A súa convocatoria para este campionato impediralle participar co Froiz na Volta a Galicia, tal e como tiña previsto o equipo.