O Complexo Deportivo Rías do Sur xa está preparado para acoller unha das competicións de referencia do waterpolo nacional.
Durante esta fin de semana, os días 21 e 22 de febreiro, Pontevedra será sede da cuarta edición da Copa Federación de waterpolo feminino, un torneo que reunirá os catro mellores equipos da Primeira División Feminina tras a primeira fase da tempada: CN Rubí, CN Barcelona, CN Cuatro Caminos e o anfitrión CW Pontevedra.
A competición disputarase en formato de semifinais, final e partido polo terceiro e cuarto posto.
O primeiro partido será o sábado 21 a partir das 17:00 horas, onde se enfrontarán o líder do Grupo A, o CN Rubí, fronte ao segundo do Grupo B, o CN Cuatro Caminos.
O conxunto catalán pechou a primeira fase con 41 puntos (14 vitorias en 14 partidos, unha delas por penaltis), mentres que o equipo madrileño foi segundo con 30 puntos de 42 posibles (10 vitorias e 4 derrotas).
A quenda do Waterpolo Pontevedra chegará ás 19:00 horas. O equipo anfitrión, que realizou unha primeira fase inesquecible finalizando líder do Grupo B, verase as caras co CN Barcelona, decano do waterpolo español.
As pontevedresas concluíron a liga regular con 35 puntos de 42 posibles (12 vitorias e dúas derrotas), mentres que as catalás foron segundas do Grupo A con 34 puntos de 42 posibles (11 vitorias e tres derrotas, unha delas por penaltis).
A pelexa polo terceiro e cuarto posto, así como a gran final, terán lugar o domingo 22 de febreiro ás 11:00 e ás 13:00 horas, respectivamente.
O evento foi presentado este xoves pola concelleira de Deportes, Anabel Gulías; acompañada polo presidente da Real Federación Española de Natación, Fernando Carpena; o presidente da Federación Galega, Juan Carlos Brión; o coordinador de Deportes da Xunta de Galicia, Guillermo Reinaldo; o presidente do club, Alberto López; o director técnico do Complexo Deportivo Rías do Sur, Jorge Castro; o adestrador do equipo, Arthur Neves; e as xogadoras Andrea, Rocío e Irene.
Durante o acto, Gulías destacou que a celebración desta competición "pon a guinda a un pastel que empezamos a construír fai moito tempo", encomiando o crecemento dun deporte acuático que "nos está dando moitas delicias".
Pola súa banda, Alberto López, presidente do CW Pontevedra, sinalou que este torneo "é a culminación dun enorme traballo do club e, especialmente, das xogadoras", subliñando o seu desexo de que Pontevedra "deixe de ser unha illa pequeniña e soe cada vez máis como un sitio chulo para o waterpolo español".
"Estamos a avanzar nunha liña moi positiva", engadiu, "este ano, por primeira vez, xogadoras españolas quixeron vir aquí por iniciativa propia, o que demostra o bo traballo que se fai a nivel de grupo".
Por último tomou a palabra o presidente da Federación Española, quen tamén incidiu no traballo que se está facendo desde Pontevedra para cos deportes acuáticos.
"Fostes queimando etapas e si estades onde estades é porque hai solidez", valorou Carpena, quen destacou "a estrutura, ganas, piscina e estabilidade" que ten a Boa Vila.
No obxectivo de expandir o waterpolo por parte do organismo, "Pontevedra está moi preto de consolidarse. Temos que seguir crecendo e necesitamos un referente do waterpolo galego na máxima categoría. Paso a paso e co voso esforzo seguro que o conseguiremos", asegurou dirixíndose ao club pontevedrés.
Engade Pontevedra Viva como fonte preferida de Google de balde
Mantente informado coas últimas noticias de actualidade.