A 'Marea Granate' prepárase para desembarcar en Vilagarcía o vindeiro domingo 17 de abril con motivo do esperado derbi fronte ao Arosa.
O club arlequinado enviou á entidade granate 300 entradas para o duelo da Lomba (domingo, 17.00 horas), que venderá aos seus seguidores nas oficinas do Estadio Municipal de Pasarón.
Os billetes terán un custo de 15 euros (5 euros para menores de 15 anos), e poderanse adquirir soltas ou incluídas nun desprazamento organizado en autobús que será de balde. Este autocar ten prevista a súa saída o mesmo domingo desde o Pavillón Municipal dos Deportes ás 15.30 horas para regresar unha vez terminado o duelo.
Debido á Semana Santa, a venda das entradas limítase ás xornadas de martes (11.00 a 14.00 horas e 16.00 a 19.00 horas) e de mércores (9.00 a 14.00 e 16.00 a 19.00 horas).
Todo para vivir un duelo de rivalidade comarcal que promete ambientazo e no que haberá moito en xogo para ambos os dous equipos, inmersos na pelexa polo ascenso polo lado granate e pola permanencia no bando arousán.