A Liga Feminina 2 de baloncesto na que volverá militar un ano máis o Club Baloncesto Arxil xa ten folla de ruta para a nova tempada, tras a publicación do seu calendario por parte da Federación Española.
O club pontevedrés iniciará o curso na casa, no Centro Galego de Tecnificación Deportiva, o día 7 de outubro recibindo ao Hierros Díaz Miralvalle.
A primeira saída da liga chegará unha semana despois, 14 de outubro, co derbi provincial fronte ao Cortegada, en Vilagarcía.
Pola súa banda o cadro arousán visitará Pontevedra na xornada 15 do campionato, prevista para o 27 de xaneiro.
En canto ao final da competición regular, a última xornada deparará un duelo na súa pista para o Arxil ante o BF León o día 13 de abril.
No que respecta ao formato esta campaña da Liga Feminina 2, tras a disputa das 26 xornadas de fase regular, os catro primeiros equipos de cada un dos dous grupos accederán á fase final, na que se poñerán en xogo dúas prazas de ascenso a Liga Challenge.
Perderán a categoría os tres últimos equipos da liga regular tanto no Grupo A como no B.
Consulta aquí o calendario completo do Grupo A de a Liga Feminina 2 23-24.