Dende o ano 1999 o equipo feminino da Sociedad Gimnástica non volvera pisar o podio do Campionato Galego de Clubs ao aire libre.
A mala xeira acabou o pasado sábado en Ferrol, nas pistas da Malata, cun brillante terceiro posto grazas a un equipo carcarterizado pola xuventude.
Ría de Ferrol dominou a competición feminina con 134 puntos, superando ao Celta (125) e a Gimnástica (114), que logrou unha vantaxe suficiente co cuarto e quinto posto de Lucus e Vila de Cangas, ambos os dous con 96 puntos.
A cruz da xornada, que estivo marcada pola mala climatoloxía, foi para o equipo masculino, xa que os rapaces quedaron fóra do podio por primeira vez en 10 anos ao ser cuartos.
O gañador masculino foi o Celta (134 puntos), seguido de Narón (118), Lucus (100,5) e Gimnástica (96).
A entidade pontevedresa logrou, iso si, o título honorífico de mellor club da competición sumando ambas as dúas categorías.
No apartado indiviual algúns atletas rexistraron marcas interesantes malia a chuvia, como Jorge Puig, segundo nos 1.500 metros con 3.55.67 e marca mínima para o nacional júnior, ou as rapazas do relevo curto, Verónica, Paula, Lucía e Esperanza que foron terceiras con 51.89.
Tamén lograron a mínima Rocío Rodríguez nos 1.500 promesa e o xuvenil Ángel Vargas.