Cinco meses despois de ter que suspender os adestramentos de todas as súas categorías coincidindo co decreto de estado de alarma, o Club Baloncesto Arxil volveu este mércores 19 de agosto á actividade.
Fíxoo cun dos seus equipos, o júnior, que desta forma volve aos adestramentos pensando na fase de ascenso coa que, se a pandemia permíteo, dará comezo a tempada.
"A fase de ascenso do júnior fainos volver á actividade. Tomamos a decisión de regresar aínda que sempre adaptándonos á normativa vixente", asegura o adestrador do equipo e directivo do club, Lino Vázquez, sinalando que "tamén as nenas necesitábano tanto emocional como socialmente".
O pavillón Multiusos da Xunqueira foi o escenario da primeira sesión de traballo arxilista, na que se adoptaron as medidas para cumprir os protocolos de regreso á actividade elaborados pola Secretaría Xeral para o Deporte e polo Concello de Pontevedra.
Entre as normas de prevención esixidas atópanse polo momento a limitación do número de persoas que poden estar no adestramento, evitar o contacto entre as xogadoras e que cada unha delas utilice o seu propio balón, ademais do uso de máscaras por parte do corpo técnico e fóra da pista e da desinfección do material utilizado.