A segunda tempada do Poio Fútbol Sala na Primeira División Feminina arrancou este martes co primeiro adestramento das vermellas no pavillón da Seca.
Co seu novo adestrador, Gonzalo Iglesias 'Morenín', ao mando 12 xogadoras estaban citadas ao inicio da pretempada, entre elas tres das fichaxes: a brasileira Raquel Souza e as pontevedresas Jenny Lores e Irene Floriani.
Só faltaba na sesión a internacional portuguesa Ana Carolina Servolo, procedente do actual campión da liga portuguesa, que ten previsto incorporarse á disciplina do equipo esta mesma semana.
O obxectivo da tempada volve ser a permanencia na máxima categoría, algo que pasa segundo Morenín por "sacar el máximo rendimiento a las futbolistas". Só así, defende o técnico, o equipo poderá loitar pola permanencia e "intentar disfrutar de la categoría".
O conxunto vermello afrontará ata o 13 de setembro, data de inicio da liga, sesións diarias de preparación alternando con dobres sesións e partidos amigables con equipos de Primeira e Segunda División que aínda están por confirmar.
En canto ás novidades, outras das caras novas da xornada foi o preparador físico Daniel Díaz, que chega ao Poio FS procedente do Azkar Lugo.