Martita seguirá vestindo un ano máis a camiseta do Poio Pescamar e xa suma catro tempadas no equipo conserveiro.
Non se trata dunha renovación en si, xa que era unha das dúas futbolistas que xa tiñan contrato para a próxima campaña, pero o conxunto de Poio confirmou a continuidade dunha das súas xogadoras máis importantes.
Desde a entidade destacan que, a pesar da súa mocidade, no recentemente finalizado curso formou parte do grupo de capitás e como tal exerceu na pista. Foi unha das tres xogadoras que participou nos 40 partidos de competición oficial, acumulando 37 titularidades (a que máis, xunto a Laura Uña).
Ademais, asinou seis goles e dúas asistencias, todo en liga, superando a cifra de cinco goles marcados na campaña anterior.