Volve a competición despois de dúas semanas de parón á Superdivisión masculina de tenis de mesa e faino cunha xornada especial para o Visit Pontevedra.
O conxunto pontevedrés, que está a callar unha gran tempada no seu segundo ano na elite e marcha quinto na táboa, recibirá o domingo ás 11:00 no pavillón de Príncipe Felipe o Hispalis de Sevilla, décimo da táboa.
Será a ocasión de ver en acción por primeira vez á recente incorporación do Tenis de Mesa Monte Porreiro, o xaponés Shohei Onodera, de quen espera que achegue un salto de calidade ao equipo nos meses decisivos do campionato.
Ademais, confirmou a presenza no enfrontamento o seleccionador arxentino Gustavo Levisman, que esta semana se desprazou a Lisboa con motivo do Open de Portugal.
Pola súa banda, o equipo feminino de División de Honra desprazarase esta fin de semana a Vigo para visitar o Illas Cíes TM.