O Pontevedra Club de Fútbol saca o carbón co seu primeiro triunfo de pretempada.
Na que era a súa segunda cita estival, tras o Luís Otero contra a Cultural Leonesa, o conxunto granate sumou os seus primeiros goles e triunfo do curso ao imporse na Pobra do Caramiñal ao Puebla FC, equipo que milita en Preferente (1-2).
Foi un duelo marcado pola calor e con dous partes ben diferenciadas.
"Na primeira parte mentres tivemos un ritmo alto de xogo competimos moi ben e xeramos ocasións de gol", recoñeceu de feito Rubén Domínguez tras o encontro.
Así nos primeiros 45 minutos chegaron os tantos de Alain Ribeiro no minuto 33, na súa primeira diana co Pontevedra, e de Brais Abelenda ao fío do descanso.
Con todo na segunda parte o duelo terminouse facendo longo e "o feito de acabar con 10 ao final estabamos a desexar acabar", recoñeceu o técnico.
No tempo de desconto chegou o gol da honra para os locais para o definitivo 1-2.
"Seguro que co paso dos días, dos adestramentos e incorporando xogadores seremos un equipo mellor", afirmou Domínguez sobre o rendemento dun plantel aínda moi curto de efectivos.
O conxunto granate formou na Pobra cun once titular formado por Edu Sousa, Garay, Miki Bosch, Diego, Alain Ribeiro, Miguel Cuesta, Nico, Yelko Pino, Hervías, Brais Abelenda e David Marqués.
Posteriormente participaron tamén Alex González, Expósito, Guille, Efrén (porteiro suplente), Sebas, Canosa e Galego.