Non puido ser. O Club Baloncesto Arxil acusou o cansazo do encontro deste sábado en Mataró e caeu ante o Girona, rompendo así coa súa serie de sete xornadas consecutivas gañando en Liga Feminina 2.
O inicio non foi nada ben para o equipo pontevedrés, que encaixou un parcial de 25-14 que obrigaba unha urxente reacción.
Axustou certos aspectos o Arxil e entrouse nunha fase de completa igualdade para chegar así ao descanso nun resultado de 42-31.
Con todo, tras o paso polos vestiarios, o Girona, comandado por Coma e Melero, volveu poñer contra as cordas ás de Mayte Méndez, que xa empezaban a ver perigar o encontro (61-42).
Reaccionaron as de Pontevedra no último cuarto grazas ao acerto anotador de Nerea Liste (16 puntos) e Marta Fernández (14 puntos), pero xa era demasiado tarde, os erros en defensa habíanas penalizado demasiado e quedaron sen unha posible remontada.
Consulta as estatísticas nesta ligazón