Adrián Esperón e Patricia Martínez afrontan con ilusión o que será o seu próximo gran reto da tempada, os World Games.
Esta competición, similar aos Xogos Olímpicos pero na que compiten ata 25 modalidades deportivas que non están incluídas no seu programa, celébrase tradicionalmente o ano posterior á cita olímpica.
A cidade polaca de Wroclaw será escenario do evento entre os días 20 e 30 de xullo e alí estarán os pontevedreses, 14 veces campións de España.
Patricia e Adrián foron recibidos este venres pola deputada provincial de Deportes, Chelo Besada, que lles deu animos para semellante competición.
Ambos os dous serán os representantes españois na modalidade de Standard, dentro do baile deportivo, mentres as outras dúas parellas nacionais participarán en Latinos e Salsa.