Cinco finais quedan ao Pontevedra Club de Fútbol para lograr a ansiada clasificación ao play-off de ascenso a Segunda División.
Este sábado ás 16:15 terá lugar a primeira desas finais e será no Municipal de Pasarón contra un rival de entidade como é o Celta Fortuna. A situación do equipo xunto á boa dinámica das últimas semanas espertaron un gran interese na cidade por acudir a un encontro que pode ser determinante.
E é que os de Rubén Domínguez son terceiros na táboa con 52 puntos, xusto por detrás do filial celeste. Unha vitoria achegaría enormemente ao conxunto granate ao soño do play-off.
Desde o club lerezano tamén se incentivou á afección a arroupar ao seu equipo cunha promoción na que cada socio pode retirar unha entrada para a súa mesma granda por 1€.
Sectores como Fondo Norte xa colgan o cartel de "completos" desde mediados desta semana.
As previsións sobre a asistencia a Pasarón son optimistas, polo que o Pontevedra CF xunto ás Forzas e Corpos de Seguridade do Estado recomendan á afección granate acudir ao recinto deportivo con máis antelación da habitual para evitar longas colas nas entradas.
A entidade lerezana compartiu nas súas redes sociais esta e outras indicacións enfocadas a xerar o mellor ambiente posible ao longo dos noventa minutos de partido.
Ir a Pasarón con roupa granate e animar durante todo o encontro son algunhas das suxerencias que o club compartiu cos seus seguidores de cara á importantísima cita deste sábado.
Engade Pontevedra Viva como fonte preferida de Google de balde
Mantente informado coas últimas noticias de actualidade.