Poucos clubs poden presumir de conseguir vencer o Campionato de España Absoluto de Squash con dúas xogadoras diferentes e con poucos anos de diferenza.
Si o pode dicir o Squash Pontevedra, grazas primeiro a unha veterana como Xisela Aranda e agora a unha xogadora formada desde hai anos nas súas filas, Marta Domínguez.
A deportista viguesa creceu deportivamente na Boa Vila ata converterse con só 19 anos en campioa nacional, vencendo no campionato celebrado a pasada fin de semana en Barcelona.
Ese triunfo, que se suma ao subcampionato conseguido en 2019, supón todo un reforzo ao traballo dun club humilde como o pontevedrés.
Ese esforzo quixo ser tamén recoñecido este xoves cunha recepción oficial no Concello de Pontevedra ofrecida polo alcalde, Miguel Anxo Fernández Lores, e o edil de Deportes, Tino Fernández, á protagonista da fazaña e tamén ao seu adestrador e alma máter do club, Miguel Novegil.