A borrasca Herminia, con alertas meteorolóxicas de nivel amarelo e laranxa nas Rías Baixas, obrigou a suspender o domingo o partido entre Pontevedra Club de Fútbol e CD Numancia, ofrecendo un respiro ao maltreito céspede do Estadio Municipal de Pasarón.
Ninguén buscaba o adiamento, que obrigará a xogar un encontro de máxima tensión e importancia entre semana, pero o certo é que a situación ofrece unha ventá de oportunidade para tentar recuperar na medida do posible o terreo de xogo.
O verde terminou en mal estado o duelo do pasado 19 de xaneiro contra o Compostela, afectado pola acumulación de partidos nas últimas datas entre liga e Copa do Rei e polas choivas caídas.
Cunha semana continua de precipitacións e o mal tempo previsto inicialmente, antes de que chegase a suspensión, temíase que o partido do Numancia acabase por malograr o céspede do estadio pontevedrés.
Con todo esta inesperada suspensión, a falta de nova data para o partido, pode supor até 21 días sen partido oficial en Pasarón.
Os granates de feito non teñen a día de hoxe un encontro como local até o domingo 9 de febreiro (17.00 horas) contra o Langreo, xa que a próxima xornada competirán a domicilio ao visitar o Fabril en Riazor.
Todo iso sempre que o Comité de Competición non estableza antes a nova data para o Pontevedra-Numancia, un duelo entre primeiro e segundo clasificado que, todo apunta, xogarase un mércores nunha data que non se alongará moito no tempo.
No que respecta ao Numancia, os seus próximos compromisos ligueiros van medilo na casa ao Bergantiños (2 de febreiro) e, a domicilio, contra o Fabril (9 de febreiro).