A Copa do Mundo de Natación Artística que se celebrará en Pontevedra entre o 29 e o 31 de maio é o lugar escollido pola Selección Española Absoluta para presentar unha nova e rechamante coreografía na que levan meses traballado e coa que aspiran ao máximo pensando nos Xogos Olímpicos de Los Ángeles.
A rutina acrobática que presentará por primeira vez España contará con música de Rosalía e o seu rompedor disco Lux. Toda unha garantía de impacto para o público.
Así o confirmou a seleccionadora nacional, Andrea Fuentes, en declaracións como as ofrecidas hai uns días a Radio Nacional de España.
"Con Rosalía fixemos unha bomba que imos presentar en Pontevedra por primeira vez, na Copa do Mundo, que hai anos que non se fai en España", avanzou a seleccionadora.
"Vaise a encher a bancada. Temos moitas ganas de presentar por primeira vez estas coreografías novas que fixemos que van ser un bombazo", afirmou a adestradora do equipo nacional.
Unhas declaracións feitas antes de que as entradas para a Copa do Mundo de Pontevedra se puxesen á venda, e que demostraron a gran expectación levantada pola Selección Española ao esgotar as localidades das sesións de sábado e domingo pola tarde (cando se disputará a final da rutina acrobática) nun dicir amén.
De feito das seis sesións que comporán a programación desta gran competición internacional xa só quedaban dispoñibles este xoves 16 de abril entradas para o venres, tanto de mañá como de tarde, e o sábado en sesión matinal.
Os billetes teñen un prezo de 10 euros para as xornadas matinais e de 15 euros para as de tarde.
A de Pontevedra será a primeira gran competición que disputará a Selección Española Absoluta de Natación Artística co seu equipo titular desde o Campionato do Mundo de Singapur en 2025.