Os campionatos de España de taekwondo celebrados durante a fin de semana en Cartaxena deixaron grandes noticias para o taekwondo pontevedrés.
Unha delas chegou en categoría sub-21 coa medalla de ouro de Sergio Troitiño (Mat's de Marín) que lle supón ademais o premio extra da clasificación directa para o próximo Campionato de Europa da categoría.
Troitiño segue destacando na súa progresión e en Cartaxena realizou un torneo inmaculado vencendo en tres combates. Primeiro impúxose a Mohamed Halhoul Hossain (Ceuta) en dous asaltos e despois superou tamén en dúas mangas aínda que máis axustadas o andaluz Jesús Gómez para citarse na final co campión da pasada edición.
No combate polo título Sergio foi mellor que Lucas Llopis en dous asaltos demostrando o seu bo momento de forma.
O Mat's de Marín logrou ademais outras dúas medallas con Daniel Agra, prata, e Ángela Balado, bronce. Ambos na competición cadete.
Pola súa banda o cadete Roi Fraga deulle unha medalla de ouro ao club Número Phi Taekwondo de Caldas de Reis.