deportes

Teresa Abelleira: "Teño o mellor ao meu lado para volver máis forte. Até pronto pelotita"

Pontevedra
28 de febreiro 2025
Diego Espiño

A futbolista pontevedresa, lesionada gravemente no seu xeonllo nun adestramento coa Selección, compartiu unha mensaxe nas súas redes sociais agradecendo o apoio recibido

Teresa Abelleira, entrando en Wembley con muletas
Teresa Abelleira, entrando en Wembley con muletas / RTVE

Onda de apoio cara a Teresa Abelleira tras confirmarse a grave lesión que sofre no seu xeonllo esquerdo, coa rotura do ligamento cruzado e tamén do menisco.

A futbolista pontevedresa fíxose dano no adestramento da Selección Española do pasado martes 25 en Wembley, pero non foi até a tarde do xoves na que a noticia se fixo oficial co parte médico publicado polo seu club, o Real Madrid. Desde ese momento, as mostras públicas de apoio non tardaron en chegar.

Un agarimo que quixo agradecer Teresa a través das súas redes sociais cunha mensaxe no que recoñece tamén que "por desgraza non son a primeira nin serei a última", e que ante esta adversidade "hai moitos exemplos para saber que é unha oportunidade para aprender e crecer".

"Teño o mellor ao meu lado para volver máis forte", asegura a campioa do Mundo antes de despedirse cun gráfico "até pronto pelotita".

Nada máis facerse oficial a súa lesión un das primeiras mensaxes chegou desde a conta da Selección Española Absoluta, lembrando que "nos guiaches cara á estrela e agora tócanos acompañarte máis que nunca nesta etapa".

Afirma o equipo nacional que "sabemos que volverás mesmo máis forte" e que "toda a familia da Selección está contigo".

Tamén a seleccionadora, Montse Tomé, compartiu unha mensaxe cara á centrocampista. "Mágoa deste día. Botaremos de menos o teu fútbol", sinalou a adestradora.

Moitos foron ademais as mensaxes recibidas de afeccionados e de compañeiras, destacando os publicados en Instagram polas líderes da Selección Española, as balóns de ouro Alexia Putellas e Aitana Bonmatí.

Alexia, que xa pasou polo duro transo ao que agora se enfronta Teresa Abelleira, afirmou que "sinto moita rabia polo que pasou. É un camiño duro, pero moitas o superamos... E ti encima es doutra pasta. Conseguiralo ao 100%", mentres que Aitana quixo enviar á súa compañeira "moito ánimo" avanzando que "te esperamos de volta".

Máis novidades